Adrian søkti Víking!

Við einum frálíkum seinna hálvleiki, fingu vit vent einum hóttandi tapið til ein sigur.

Í fyrra hálvleiki var ikki nógv at rópa hurra fyri. Manglandi konsentratión og skeivar avleveringar elvdu til frustratión. Bæði á vøllinum, og millum áskoðararnar. Tá Víkingur so legði seg á odda, tøktist panikkurin breiða seg.

Hvat bleiv sagt í hálvleikssteðginum, vita vit ikki. Men tað riggaði í øllum førum. Tí liðið var sum hamskift. Meira ferð kom á spælið, avleveringarnar sótu betri og menn tóktust hava meira orku. Men tað skuldi ein Adrian-special til, áðrenn vit fingu javnað. René bleiv feldur úti í vinstru síðu, og Adrian gjørdi seg til reiðar at sparka. Flestu vanligu, deyðiligu fótbóltsspælarar høvdu lagt bóltin innfyri. Men vit vita at Adrian er ikki sum fótbóltsspælarar flest. Hann smekkaði til, og hóast Víkinga málverjin sprellaði, sum stóð tað um lív, brast bólturin í kassan til 1-1!

Undan dystinum elti bæði liðini hini toppliðini, og ein javnleik kundi eingin brúka til nakað sum helst. Og eitt korter fyri leiklok, bragdaði aftur. Eitt væl kombinerað álop endaði við, at René bleiv feldur í brotsteiginum. Adrian var settur at skjóta, og hann var tryggleikin sjálvur. 2-1! Tíggju minuttir seinni bleiv sigurin staðfestur. Og enn einaferð var tað Adrian, ið átti síðsta fótin. Úr høgru dregur hann inn ímóti brotsteiginum, og júst sum øll nærmast væntaðu at hann fór at smekka bóltin upp í longra hornið, tók hann í staðin og skeyt flatt, niður við nærmastu stong. Enn eitt frálíkt mál, og harvið hat-trick til Adrian.

Hetta vóru trý sera týdningarmikil stig, og vit liva enn í FM-stríðnum.

Hagtøl

HB - Víkingur 3-1 (0-1)
0-1 Andreas Lava Olsen
1-1 Adrian Justinussen
2-1 Adrian Justinussen
3-1 Adrian Justinussen

Liðið í dag: Teitur M. Gestsson, Magnus Egilsson, Brynjar Hlöðversson (liðsk.) (Daniel Johansen), Adrian Justinussen, Tróndur Jensen, René Shaki Joensen (Jógvan Rói Davidsen), Pætur Petersen, Bartal Wardum, Hørður Askham, Ari Mohr Olsen (Sebastian Pingel), Lasse T. Andersen

Óbrúktir eykaleikarar: Mattias Lamhauge, Dan í Soylu, Andreas Breimyr, Símun Samuelsen

Dagsins leikari: Adrian Justinussen

Mynd: Rakul Hansen

Zircon - This is a contributing Drupal Theme
Design by WeebPal.